Mar 30

Ойлон кыргыз!.

Posted on 30 Жалган куран айы, 2014 by aidaraliev

Аида ТОКОНОВА. Экономист, дипломат,
Эл аралык мамилелер боюнча адис.

УРМАТТУУ МЕКЕНДЕШТЕР!

Азыркы учурда Журт башчыбыз, бийликтеги кыйындарыбыз өз ара бийлик талашып, улам-улам Өкмөттү алмаштырып, биринин абийирин, айыбын бири ачуу менен алек болуп атканда, ички, тышкы душмандарыбыз жөн турбай баш көтөрүп, жыландын башын кылтыйтып жатышат… Баш көтөргөнү да эп болуп атса, болгон ырыстуу нерсебиздин баарын Оруска сатып, сатпаганын бекер кармата берип жатсак…

Орустун тыңчылары минтип өзүбүздүн колубуз менен Эркиндигибизден ажыратуу аракетин көрүшүүдө. Алжыган дүжүр чалдарыбыз намыс-арын жыйыштырып коюп эле келгин орустарга кошулуп алып, кыргызды «Орусиянын составына кошулбасак болбойт, бизге эркиндиктин кереги жок, ошолор бизге нан берет, душмандан сактайт. Биз орусча сүйлөшүбүз керек, кыргызчабыз ансыз деле унутулбайт» деп элди үндөп урпактарын кулдукка түртүп жатат. Шилтемени ачсаңыздар видео-тасманы көрөсүздөр. http://new.livestream.com/kabarlar/kabarlar/videos/45562749

Душманды алыстан издебей эле койгула. Мына Чыккынчы, Эл душмандары минтип ичибизден эле табылып жатат!!! http://www.tushtuk.kg/society/13613/

Муну кантип түшүнсө болот? Орус тили расмий тил болгону жетишсиз болуп жатканбы?
http://www.24kg.org/community/174715-igor-trofimov-v-kyrgyzstane-5-zakonov.html

https://www.facebook.com/photo.php?fbid=725053920860115&set=a.125295050836008.13710.100000665403937&type=1&relevant_count=1 – Украинадагы көрүнүш.

Ал эми Орусия бийлиги мындай тыңчыларын бизге жөнөтүүнү мыйзамдаштырып да жатат.
http://www.vb.kg/doc/220845_pytin_yzakonivaet_deiatelnost_rossiyskih_specslyjb_na_territorii_kyrgyzstana.html -.

17-мартта акция өткөрүштү, Улуу Ата Мекендик согуштун ардагерлерин аянтка сүйрөп келишип, «НЕ ДАДИМ РАСКОЛОТЬ КЫРГЫЗСТАН! НЕТ КЫРГЫЗСКОМУ МАЙДАНУ! СОХРАНИМ ЕДИНСТВО СТРАНЫ! НЕ ПОДДАДИМСЯ ПРОВОКАЦИИ! НЕТ ЗАПАДНЫМ ПОЛИТИКАМ!.»

Негизинен бул үгүт иш чараларын биздин билишибизче, Кыргызстанда, айрыкча Бишкекте, ошондой эле Москва, Санкт—Петербург, Новосибирск өңдүү Орусиянын ар кайсы шаарларында орустун саясий бот-тролли центрлери (агенты влияния) иштеп жатышат (алар жөнүндө бул жактан кеңири маалымат ала аласыңар http://www.cossa.ru/articles/155/12676/). Ал центрлердин ар бир офисинде үйрөтүлгөн 50дөй орустун жаштары Интернеттеги кыргызстандык социалдык тармактарда (соц. сетях) кыргызча аттар менен чыгып алышып, кыргыздарды, айрыкча жаштарына өздөрүнүн идеологияларын даават кылып иштешет.

Мындан тышкары, бизге белгилүү болуп калганынын бири Москва шаарындагы К. Ф. Затулин жетектеген «Институт стран СНГ» жана анын эксперттери. Бул институт СНГ чөлкөмүндө улуттар арасында жаңжал, чатактарды уюштуруучу өнөрү менен белгилүү экен. Жетекчиси Затулин, каймана аты «Костя – 40 процентов», студент кезинен эле «сексот», «стукач» болуп шугулданган, кийин политтехнологиялар, пиар, шайлоо эксперти болуп, Гос. Думанын депутаты да болууга үлгүргөн. Бирок бүгүнкү күнү Украина, Грузия мамлекеттеринде «Персона Нон-Грата», б. а. дипломатиялык укук боюнча ал өлкөгө киргизилбеген жагымсыз адам. Бүгүн Кыргызстанда, ошондой эле ФБтун кыргызстандык саясий топторунда ушул мекеменин эксперттери иштеп жатышат. Алар Кыргызстандагы орус улутундагы журналист, сүрөтчү жана өздөрүнө окшогон аналитикалык борборлордун, институттардын кызматчылары менен тыгыз байланышта болуп, ар кандай иш-чараларды өткөрүп, Кыргыз өлкөсүнүн бардык аймактарын, өзгөчө түштүгүн көп кыдырып, студент-окуучулар менен, алардын мугалимдери менен, кары-картаңдар менен жолугушуп, пресс-конференция, семинар, лекцияларды өтүп жатышат. Лекцияларынын тематикасы, жайылткан идеялары – Орусия менен жакындашуу, Бажы Биримдигине кошулуу.

«Фейсбукта» мындай агенттерге туш болгон патриот жарандарыбыз зыян тарта башташты. Себеби, бул оңбогурлар Бишкектеги пикирлеш журналисттеринин жардамы менен мекенчил жарандарыбыздын үстүнөн УККМге улутчул, провокатор деп арыз жазышып, иштеген иштерине чейин барып, орус тилдүү гезиттерге «Фейсбуктагы» кат алышуусун сүрөткө тартып алып чыгарып жатышыптыр.

Мен «Фейсбуктагы» бул тыңчы-троллилерге кабылып, бир топ каршы туруп кармашканымдын далили мына бул болду. Алар мени кара тизмеге киргизип, талкуулоосу мына бул жерде:

Бул Александр Евграфов – эң ашынган саясий тролль, маектешине эң жагымсыз, тилдешип айтышууга провокация кылган, башкаларды куугунтуктап, ачууланууга, жаңжалга үндөгөн, кыжырды кайнатып, кайра басмырлап, кордоп, кемсинтип, шылдыңдоо менен иштеген чагымчыл
адам экени ачык байкалды. Көрсө Евграфов бир гана Кыргызстанда иштебейт экен…

Евграфов – жакшылап изилденүүчү неме көрүнөт. Ал ФБ да 61 топтун мүчөсү болуп алган. Көпчүлүгү РФ нын геосаясый кызыкчылыктары менен байланышкан. Алардын бири өзгөчө көңүл бурууга татыктуу. Ал топтун аталышы – «Я – Российский империалист».

Дагы башка топтору: «Белое движение», «Русские витязи», «Трудовые мигранты Таджикистана». Эмне үчүн Кыргызстандын жаранымын деген А. Евграфов мындай тематика менен кызыгат болду экен?

«Я – Российский империалист» тобу жана анын максаттары!

Биздеги Александр Князев деген белгилүү журналист, коомдук ишмерибиз дагы ушул топтун мүчөсү экен!.

Казачество и Величие. Бул орус казактары биздин Кыргызстаныбызда дагы жашашат. Бул уюшулган куралчандардын тобу, Империя идеологиясын тутунган (илгерки Орус империясынын жазалоочу отряды болчу, Империя – азыр жок, бирок Казачество сакталып калган). Негизинен булар кыргыз коомчулугунан оолактап, өзүнчө жашаган коом. Крымдагы окуяларда жергиликтүү казактары Орусияны жактап иштеп беришти.
Булар качанкы Ак падышасына ант бергенин унутпай жүрүшөт…
А биз кыргыздар 1916-жылды, Үркүндү унутпайлы!!!

Жаңы империяга кимди алып, а ким – татыксыз экенин талкуулоо..

Абдан «кызыктуу» топ экен. Башкы максаты – элдерди согушуп жеңип алуу, аларды орусташтыруу (русификация). Бул топтун мүчөлөрү Кыргызстанды эмне максат менен тинтип жүрүшөт? Биздин Улуттук Коопсуздук кызматына кызык эмеспи мындай нерселер?

Үстүртөн көрүп чыктым топтун маалыматтарын. Бардыгы ачыктан-ачык, фашисттик мүнөздө: Территорияларды басып алууну кубаттаган, согушуу, элдерди – «биздики» атаган бул МАМЛЕКЕТ – КОРКУНУЧТУУ болуп калды!!! Ушул кооптуу нерселерди элибиз, журт башындагылар түшүнүп жатышты болду бекен???

Mar 30

Ойгон кыргыз!.

Posted on 30 Жалган куран айы, 2014 by aidaraliev

Аида ТОКОНОВА. Эл аралык мамилелер боюнча адис,
экономист, дипломат.

МЕКЕНЧИЛДЕРГЕ КАЙРЫЛУУ!!!

Урматтуу, Көчмөндөрүм, Замандаштарым!

Учурдагы саясий кырдаалда, дүйнө жүзү эки маалымат талаасына бөлүнүп турганда, “Кыргыз Көчүбүздү” саясатка аралаштырбай, ар кимдин көз карашы ар бөлөк эмеспи деп, ынтымагын, жайдары-куунак маанайын сактап, буга чейин кайрылган эмесмин. Бирок “саясат менен сенин ишиң болбосо, саясаттын сени менен иши болот” дегендей дүйнө жүзүндө, анын ичинде биздин кичинекей өлкөбүздө саясат ар бир жаранга тиешелүү болуп, кырдаал курч, абалыбыз чатак болуп турат. Ошондуктан, Көч башыбыз Асыран байкемдин уруксаты менен, мекенчил Көчмөн катары өзүм күбө болуп жаткан жагдайларга, өлкөбүздөгү эң орчундуу маселелерге ар тараптуу талдоодон өткөн көз караштарымды билдирип, Кыргыз элимди ошол маселелерге этият мамиле кылууга үндөп, Сиздерди кабардар кылууну туура көрдүм.

Президентибиз Алмазбек Атамбаевдин жарлыгы менен быйылкы жыл – Мамлекеттүүлүктү чыңдоо жылы деп жарыяланган. Бирок, тилекке каршы, чыңдамак түгүл эгемендүүлүгүбуздү, аны менен кошо мамлекеттүүлүгүбүздү жоготуу коркунучу алдында турабыз десем жаңылышпайм (жаңылып эле калсам гана!), бул Сиздерди коркутуу, Элди козутуу эмес. Себеби:
1. Жыл жаңыргандан бери Кумтөр чыры чубалып келип, эң көп үмүттөндүргөн байлыгыбыздын тагдыры дагы деле элдин пайдасына эмес чечилип калганына өзүңүздөр күбөсүздөр.
2. «Кыргызгаз» ГазПром ишканасына Орусия тарапка сатылды.
3. «Камбар- Ата» ГЭСи, жана орустардын «Росгидро» ишканасы салуучу Нарындагы жаңы үч ГЭС, ошентип Энергетика сектору Орусиянын көзөмөлүнө өтүп жатат.
4. Азыр «Манас», «Ош» аэропортторунун орустун «Роснефть» ишканасына 51 % акциясы сатылганы турат. (Мамлекетке болгону 79%ы тиешелүү экен, 21%ы – жеке ишкерлердин колунда, эгер 51%ы сатылса, анда мамлекетке 28% гана калат, а эгер жеке ишкерлер да өз пайыздарын «Роснефтке» сатабыз дешсечи?)
5. 10-апрелде ОАО «Кристалл» сатыкка чыгарылат экен (А. Атамбаев оппозияцияда кезинде бул завод сатылбашы керек эле да, а азыр болсо сатылууга даяр).
6. ОАО «Дастан», НПЗ, «Кайыңды кант заводу» – булардын бардыгы Орусиянын көзөмөлүндө.
7. Орусиядагы биздин эмгек мигранттарыбыз. (Алардын канчасы орус жарандыгын алып алышкан, бүгүн болсо Орусия жарандыгын алчуларга дагы жеңилдиктерин берип, РФ жарандыгын таратып жатат).
8. Орусиянын Кант, Ош шаарларындагы аскер базалары (бирдеме болуп, чагым чыгып кетсе куралчан «жашыл кишилер» заматта пайда болуп, жерибизди басып киришет, атайын аларды алып келип да убара болушпайт).
9. Көпчүлүк теле-радио каналдары: 1-канал ОРТ, РТР, Россия 24, СТС, НТВ, ТНТ ж. б. + радио. (Орус ММКнын жалганчы пропагандасы, элди идеалогиялык жактан зомбулоо боюнча 1-орунда турат жана дүйнө жүзүндө катуу сынга алынып жатат).
10. Кыргызстанда орус улутундагылар жашайт. (Орус баскынчыларынын жакшы шылтоосу, себеби булар Орусиялык мекендештеринен потенциалдуу «жардам суроочулар»).
11. Орус тили – расмий тил. (Кыргыз тилибизди өнүктүрүү аракетибиз – улутчулдук, орус тилине болгон кысым, басмырлоо аракети деп чагылдырылат).

Бул калың элге белгилүү болгон бери жагы эле, а көмүскөдө дагы канчалаган стратегиялык объекттерибиз Орусиянын пайдасына соодаланып жатты экен, аны бир Кудайдын өзү билбесе…

Эми «Бажы Биримдиги» (Таможенный Союз) – бизге Орусия тарабынан таңууланып сунушталып келе жаткан чоң афёралык мегадолбоор. Азыркы Өкмөт, анын ичинде Орусия менен бизнеси бир чиновниктер, депутаттар Кыргызстаныбызды, Кыргыз элибизди, тагдырыбызды бүт бойдон Орусиянын карамагына өткөрүп бергени калышты…

Орусиянын тышкы саясатындагы стратегиялык максаты – мурдагы совет өлкөлөрүн интеграциялаштырып, б. а. биринчиден Бажы Биримдигине киргизип, кийинчерээк аны Евразиялык Биримдикке айлантып, анын алкагында бирдиктүү акча бирдигин (албетте рубль) жүргүзүп, мурдагы СССРдегидей «старший брат» болуп, биротоло үстөмдүгүн жүргүзүү. Мурунку муундун өкүлдөрү алданып, Совет доору жакшы эле, теңчилик, токчулук бар эле, «Өкмөт бизди өлтүрбөйт» деп Оруска дагы ишениши мүмкүн. А бирок, андагы достук мамиледеги Орусия жок, бүгүнкү Орусия – неоимпериализм, неоколониализмди көздөгөн, Улуу Орус Империясын түзүп, «жоготкон жерлерибизди чогултабыз» деп ачык жар салган таптакыр жаңы мамлекет. «Орусия – орустар үчүн!» деген лозунгду тутунган ондон ашуун орус улутчул партиялары расмий катталган, төшүндө фашист белгиси (свастика) бар эргулдардын ээн-эркин жүргөн, Орусиянын бардык аймактарында бийлигинин көзөмөлүндө «Орус маршын» уюштурган такырбаш баш кесерлердин мамлекети менен биздин жолубуз бир эмес!

Бул видео-шилтеменин 23 минутасынан тартып РФ нын Гос. Думасынын башчысынын орунбасарынын Орто Азия жана Казахстан – РФнын Ортоазиялык федералдык округу болуш керек деген сөзү.
http://z001.kz/news/view?id=1681 , http://www.youtube.com/watch?v=J5fSocfk-fo –

Кыргызстан үчүн, ооматы кеткен Орусия менен бир болуу – экономикалык жактан пайдасыз гана эмес, алсыз коңшуларын жеп-жутуп, алардын эсебинен күчтөнгөн агрессордун жанында болуу кооптуу болуп турат. Өзүнө бир тууган украин элине көрсөткөн кастыгына күбө болуп жатабыз, жерин тартып алып, ал жактагы оруска баш ийбеген Крым татарларын куугунтуктап, ал аз келгенсип түштүк-чыгыш бөлүгүн да өзүнө каратууга аракет кылып, болгон аскер күчтөрүн чек арасына топтоп, бүтүндөй Украинага согуш ачканы турат. Орус бийлигинин баскынчы саясатын туура көрбөгөн дүйнө элдиринин бардыгы жапырт сындап, кол үзүп, тескери карап кетишти. Америка, Батыш өлкөлөрү Орусияга экономикалык санкцияларды жарыялап кысымга алып жатат, ал тургай таптакыр изоляция кылабыз деп жатат. Орусия өзү кең, кен байлыкка бай өлкө болгону менен, ашынган коррупциясынын, кылмыштуулугунун айынан экономикасы начар мамлекет деп эсептелинет. Бүгүнкү күнү авторитардык маанайы күчөп, бөлөкчө ой жүгүртүп ойун эркин айткандарды куугунтук тап, адам укуктары бааланбаган түркөй мамлекетке айланган.

Бул жерде, кааласаңыздар, Бажы Биримдигине кошулуунун Кыргызстан үчүн саясий жана экономикалык бир топ терс жактарын өзүнчө келтирейин?

1. Кандайдыр бир Биридикке (Союзга) мүчө болуп кошулуу – бул жарым-жартылай, ал турагй кээ бир убакта толугу менен эркиндиктен, эгемендүүлүктөн өз ыктыяры менен баш тартуу, кечип коюуга барабар. (http://www.24kg.org/cis/175125-aleksej-malashenko-kogda-govoryat-chto.html) Ал эми Кыргазстан үчүн бул өтө эле олуттуу, анткени, биздин экономикабыз орустардыкынан 310 эсе, казактыкынан 31 эсе, белорустукунан 10 эсеге кичине жана алсыз. Ушундай ара катышта биз алар менен өз кызыкчылыктарыбызды теңата коргоп теңтайлаша алабызбы? Албетте күчтүүнүн жетегинде калабыз.

2. Көпчүлүк улуттук инфраструктуралык тармактарыбызды айкөлдүк менен орусиялык мамалекеттик ишканаларына сатылып таратуусу – биздин саясий жетекчилигибизди туздөн-түз манипуляциялоого, өз кызыкчылктарында кысымга алууга шарт түзөт. (Мындай көрүнүштөрдүн артында басмырлоону сүйбөгөн элибиздин кыжырын келтирет, пикет, митингдерге алып келет).
3. Кыргызстан ББнен алда канча ири Бүткүл дүйнөлүк соода уюмунун (ВТО) мүчөсү. Анын ненегизинде, мүчө катары биз үчүн мамлекет аралык соода салыктары бүгүнкү күндө төмөн болсо, ББне киргенибизде ал салыктыр алда канча кескин көтөрүлөт, жана бул Уюмга биз компенсация төлөө карызына батабыз. Башкача айтканда, азыркы Кыргызстанган кирип жаткан товарлардын баасы көтөрүлөт.
4. Кыргызстандын импортунун 40%ы гана ББнин өлкөлөрүнөн алынып келинет, ал эми 60%ы башка мамлекеттерден келет. Демек, биз ББнин пайдасына өзүбүздү чектеп, капаска айдагандыкка тете.

5. Экспорт тууралуу , айыл чарба продукциялары менен жеңил өнөр жайынан башка бизде өндүрүш , өнөр жай жок, бирок ошонубузду да чыгаралбайт экенбиз, себеби, бизде товарды сертификациялоочу ветеринариялык, биологиялык лабораториялар жок. ББнин өкүлдөрү болгон Казахстан менен Булорус тар өздөрүнүн продукциясын Россияга киргизе алышпай, катуу нааразы болуп жатышса, биз Орусияга бир нерсебизди сата аларыбыз өтө күмөн.

6. Бүгүнку күнү Европа Бирлиги (ЕС) бардык өнүгүп келе жаткан өлкөлөргө ВСП+ («Всеобщая система преференций+») деген программасын сунуштап келе жатат. Бул программа Европа Бирлигиндеги өлкөлөргө салыксыз (беспошлинный) 7 миң товардын түрүн киргизүүгө уруксат берет. Бул программанын негизинде Монголия сыяктуу азия өлкөлөрү абдан жакшы тыңып, экономикасы оңолүп алышты. А биздин өкмөтүбүз ББнен башка альтернатива жок деп, бир беткей эле Орусияга ооп, мындай мыкты мүмкүнчүлүктөрдү пайдалангандын ордуна,элинен жашырып-жаап жатышат.

Ал эми бул шилтемелерде ББне (ТС) кирип алданган Белорус Президентинин сөзү, казактардын, украин, армяндардын адистеринин сөздөрү бар.
https://www.facebook.com/photo.php?v=289144541243494 – Эл депутаты Инна Богословская Бажы/Евразия биримдиги, «Улуу орустар» жана Украина жөнүндөгү сүйлөгөн сөздөрү.
http://www.youtube.com/watch?v=ie0xqgkHXHM – Лукашенко Бажы Биримдигин катуу сынга алды.
http://kabarlar.kg/?newsid=21097 – Лукашенко: Украина Кыргыз өлкөсүнө, Янукович Бакиевге окшош.
http://www.youtube.com/watch?v=-8gbeVB3tDg#aid=P9R6saDXdhI – Экономист о последствиях интеграции в Таможенный союз.
https://www.facebook.com/kgvsts/photos/a.406507792781730.1073741826.406052119493964/560754490690392/?type=1 – Армения Бажы Биримдигине каршы.
http://www.24kg.org/cis/175125-aleksej-malashenko-kogda-govoryat-chto.html – Бажы Биримдиги жөнүндө сөз болсо, демек бул …Малашенко
https://www.facebook.com/photo.php?fbid=750406578316863&set=gm.680291812012947&type=1&theater – Казак чемпионунун Бажы Биримдиги жөнүндөгү сөзү.

Көкүрөктө «Мекеним» деген сүйүүсу бар Кыргызстандын жарандары үчүн – «Бажы Биримдигине кошулуу» Келишимине кол коюу – бул Кыргыз Республикасынын азаттыгына болгон өлүм жазасына өкүм чыгаруу кыянаттыгына барабар!!!

Mar 29

Элет..

Posted on 29 Жалган куран айы, 2014 by aidaraliev

АЙЫЛЫМ АЛТЫН БЕШИГИМ!.

(Очерк)

Ар качан, кай жерде, кандай күндө жүрбөйүн, көңүлүмдү түпкүрүндө Туулган жерим жашайт.

Туулган жерим асыл турагым,

Сезимимде өчпөс чырагың ,- деп Керим Турапов агабыз ырдагандай, Туулган жерин эңсебеген, сагынбаган жан жоктур..?!

Ош областынын Кара-Суу районунун Тельман айылы менин киндик кан тамган жерим, топурагы алтынга тете Ата журтум, ата конушум. Айылымдын жыты да, абасы да, суусу, топурагы да, адамдары да көзгө сүйкүм. Өмүрүмдүн он сегиз жылын ушул айылдан четке чыкпай, айылымдын суусунан моокум кана ичип, абасын жутуп жашадым. Айылымдын ар бир көчөсү, салынган ар бир үйлөр коен жатагына чейин тааныш. Айылдагы адамдардын жүздөрү, айрыкча атам апам курактуу кадырман карыларды жакшы тааныйм. Арадан жыйырма жылдай убакыт өтүп жаңыдан талпынып өскөн жаштарды эле тааный албай калганым болбосо, айылдын тургундары кайдан көрсөм да көзгө тааныш, дароо таанып алам… Анан дагы биздин Тельман айылы үлгүлүү адамдарга бай айыл. Дегеним, Социалисттик эмгектин баатыры Апсамат Абдраимовду айта кетсек. Жаштайынан элим жерим, деген, көп чоң кызматтарды аркалаган, ак алтындын планын ашыгы менен толтуруп, көптөгөн сыйлыктарга, сыймыктарга ээ болгон, азыркы убакта татыктуу эс алуудагы кадырман карыяларыбыздын бири, аксакалы. Андан тышкары, эл кызматын аркалаган азыркы кездеги айылдын кутман карысы болуп, токсондун ашын ичип жаткан Абылкасым Абдраимов, суучу болуп калкка кызмат өтөгөн Абдикарим Зооканов, үлгүлүү үй-бүлөлөрдүн катарын толуктаган Жолдошбай Боронбаев, балдарын эң татыктуу тарбиялаган Нурдин Үсөнов, Камбар Үсөновдор, узак жылдар бою бухгалтердик кызматты аркалаган Жолон Токоев, көп балалуу үй бүлөлөрдүн катарын толуктаган (менин таятам) Абдилла Исиров, менин атам Бакир Насиров, Нышанбай Тойгонбаев, Казыбек Кочкоровдор айылыбыздын көркү десем жаңылышпаган болоор элем. Ал эми ушул кичинекей айылды, айылды гана эмес бүтүн Кара-Суу районун тиш оорудан оолак кармаган тиш догдурубуз аяш атам Кадырбек Кочкоровду жана мээримдүү жүзүнөн ар убак нур төгүлгөн аяш энем Лабархан Кочкорованын да айылда кадыр баркы мааниге ээ!

Кыскасы айылдын ар бир жарандарынынөз өзүнүн маанилүү орундары бар. Аларды айта берсек сөз жетпес оов! Атинчалык боюнча айыл аялдарына сабак берген раматылык кошунабыз Аний эже жөнүндө эстечү болсок, көзү өткөнүнө жыйырма жылдан ашык убак өтсө да айыл эли күнү бүгүнкүдөй айтып бере алышат, анткени жакшы адам эстен чыкпайт деген улуу сөз бар эмеспи…

Баатыр энелер биздин айылда өтө көп, алардын эң аксакалын эле айта кетчү болсок Зайнап Кочкорова эне! Бул аял өзүнүн акылмандыгы менен, балдарга туура тарбия бере алгандыгы менен, кең пейилдиги менен мааниге ээ! Анткени, балдары да өзүнчө айыл, ар бири эл оозундагы адамдар болуп өсүштү. Айылдын кире беришиндеги мектеп, анын жанындагы фап, андан ары чок ортосунда жайланышкан балдар бакчасы, анын жанына түшкөн заңгыраган жаңы мектеп, аларга удаа мечит, анан дагы эки бет болуп салынган айылдын үйлөрү, шылдырай аккан ичке арык, арыктын жээгин бербей өскөн бой тиреген теректер, айылдын көркүнө көрк кошуп турат. Кара-Суу шаарынан Ош шаарын көздөй узунунан агылган асфальт жол салынган. Ал жолдун эки бети катарынан тыт дарактары эгилип, көзгө алыстан эле кооз көрүнөт. Ал тыттар да береги токсонунчу жылдардагы каатчылык жылдардын азабына тушуккан өңдүү, кийинчерээк саны азайып барат. Тыттарды түбүнөн эч ким кыйып кетчү эмес, анткени айыл эли курт багып, жибек өндүрүшчү, куртту тыт жалбырагы менен багышаар эле. Кийинчерээк баары демократиялашып, эгемендүүлүк орноп, базар экономикасы өнүккөн күндөн баштап, карапайым калк агылып базарга жөнөштү да, колхоздун талаа иштери калып кеткендей, себеби кийинки кездерде курт баккан адамдар жокко эсе…Ошондуктанбы айтор, тыт дарактарыбыз да чекеден суюлуп,ар кай жерде сороюп дүмүрлөрү калып, бирин серин гана калган өңдүү. Буюрса, жакшы адамдар айылыбызда өтө көп, бул тыт дарактарын кайрадан эгип, көктөнтүшөт деген үмүттөмүн. Асыресе бизде эң негизги нерсе, дыйканчылык жакшы өнүккөн, анткени айылыбыздын так үстүнөн Савай каналы агып өтөт, андыктан суубуз кеңири. Суудан кыспасын деп калышат го, анын сыңарындай берекелүү элге Кудай да оң көзү менен караган шекилдүү. Каналдын жээгиндеги мажүрүм талдар, салам салган келиндей үлбүрөшө назик гана желге желбиреп турушат. Каналдан агып келген суу пахта, жүгөрү, тамеки эгилген кең талаанын жөөктөрүнө куюлат. Суу менен азыктанып, көгөргөн ак алтын бул айылдын байлыгы, күз келээр менен анын бир талын да калтырбай терип жыйнап алганга умтулабыз. Айылдын дээрлик көпчүлүгү дыйканчылык, мал чарбачылыгы менен алектенишет.

Менин айылымда, балдарга эң жакшы таалим тарбия берип келген, жакшы адамдардын өсүп чыгышына таасири чоң болгон агай эжелерибиз да арбын. Аларды атай кетчү болсок, чү деген эле жерден эң биринчи мугалимим Мапизат эжекени айта кетсем ашык болбос.. Анткени бала жети жашка толуп, эч нерсени окуганды али билбей, мектеп босогосун аттады, ошол тентек, али көзү ачыла элек келечек ээлерине тамга таанытып, көзүн ачып, жакшы жаманды ылгаганды үйрөтүүнүн өзү эле канчалаган эмгекти талап кылаары баарыбызга маалым!.. Үчүнчү класска чейин ысык суугуна күйүп, эжелетип окутуп даярдап берген биринчи мугалимдерибизге алкыш дегим келет! Андан кийин орус тилинен сабак берген, төртүнчү класстан он биринчи класска чейин класс жетекчи болгон Улукбү эжейимден жакшы таалим тарбияны алганмын, себеби ошол эжейим орус тилинен жакшы окуткандыктан, минтип Орусия жергесинде он жылдан бери жашап эмгектенип, тирилик кылып келатам. Эжейим өзүнүн алпейимдиги, сылыктыгы менен эсимде калган. Баян эже да бизге орус тилден сабак берип, “А” класстын жетекчиси эле. Баян эжеке бизди ачык айрымдыкка, өз оюңду ортого салгандыкка тарбиялады. Математика мугалими ардактуу ардагер Тургун эжекемди да эстебей кое албайм, бул эжекебиз мыкты математик, мээге кыттай куюп окутту, анан дагы кандайдыр мээримдүү эжей эле. Физик мугалими Абдразак агайды эстесем, атам эсиме түшүп кетет. Атама көп окшотом агайды, өзү да атам экөө достордон болоор эле.. Күйүп бышып, колунан келсе мээңди ачып, бүт билгенин мээңе куюп кайра жаап койгусу келчү, алтын агайым, раматылык болуп кетти. Ал эми адабият сабагынан берген Турдубек агайды мен ар убак эстейм, ал бизге, айрыкча мага көп нерсени окутту, калем кармап калышыма да түрткү болгон десем болот. Чындыгында кыйын, күчтүү мугалим инсан! Азыр да китеп жазып , чыгармаларды жазып жүрөт деп угуп калам, бирок “чыккан кыз чийден тышкары” болуп бир барып учурашып келе албай жүрөм… Мугалимдерим жөнүндө айта берсем сөз арбын, сан жеткис…Буюрса быйыл жыйырма жылдыкта жолугуп сырдашам деген ойдомун, менин ар бир жазган чыгармам, мугалимдериме болгон урматым жана белегим деп эсептейм!..

Айылымдын ар бир окуяларын, көркүн сүрөттөп, даңктап, кала берсе гүлүнөн баштап ташына чейин кошуп жазсам да жазылып бүтпөс оов!.. Ал жерде менин балалыгым, бүтүн дүйнөм, жаны дилим калды, андыктан эстебей да, эңсебей да кое албайм. Ата-энем, бир туугандарым, чоңоюп өскөн үйүм, досторум, аяш ата , аяш энелерим, агаларым, жеңелерим, классташтарым баары ушул айылда, аларды башка шаардан көрүп калсам, баарлашып калсам айылыма бир барып келгендей болом го чиркин.Андыктан, ар дайым эсимдесиң Туулган жерим, асыл айылым!
Бар болгула айылымдын алтындан артык адамдары, менин бир туугандарым!!!

Самара НАСЫРОВА. Акын, Кыргыз Республикасынын Улуттук Жазуучулар сойузунун мүчөсү, Маскөө шаары.

Mar 23

«Көч Байланыш»

Posted on 23 Жалган куран айы, 2014 by aidaraliev

Таабалды ЭГЕМБЕРДИЕВ: Ишкер, коомдук ишмер.

«ЖАКЫНДА БИР ЭРДИК КЫЛДЫМ, ТАМЕКИНИ ТАШТАДЫМ»

«Фейсбук» социалдык түйүнүндөгү «Кыргыз Көчү» мекенчилдер тобунун «Көч Байланыш» рубрикасы тынымсыз уланууда. Кезектеги Байланышты айтылуу «Шоро» жана «Супара» улуттук ишканаларынын кожойуну, белгилүү коомдук ишмер, публицист жана ишкер мырза Таабалды ЭГЕМБЕРДИЕВ менен 15-16-мартта өткөрдүк. «Көч Байланышыта» берилген суроолордун ичинен эң мыкты аталганына Этно-комплекс «Супара» тарабынан 5000 (беш миң) сомдук сертификат ыйгарылаары айтылып, жыйынтыгында ал байгени топтун жигердүү мүчөсү, Бишкек шаарынын тургуну, жеке ишкер Бахтияр БАЛТАБАЕВ жеңип алды.

Этнокомплекс Супара: Саламатсыздарбы! Мен, Таабалды ЭГЕМБЕРДИЕВМИН, сурооңуздарга жооп бергенге даярмын!.

Сайрагүл МАТИКЕЕВА, Атланта шаарынан, АКШ. Саламатсызбы Таабалды мырза! Биз сизди Кыргызга ак эмгеги менен аттын кашкасындай таанылган, миңдеген жумушчу ордун түзүп, мамлекеттин социалдык-экономикалык абалына чоң салым кошкон «Чыныгы Бизнесмен» деп тааныйбыз. Чыныгы дегеним, сизден бизнесиңизде азыркы көпчүлүк байлардыкындай алып-сатарлык, элдин мүлкүн приватташтыруу сыйактуу жолдор аралашкан эмес. Менин бул оюма көпчүлүк макул деп ишенем. Ошондой эле, этно-комплекс «Супара» бул кыргыздын этно-маданиятын дүйнөгө таанытуунун жеткен жери, укмуш сонун идея. Менин бир сунушум жана эки суроом бар.

1) Сунушум: Бөтөлкөдөгү кымыздын орусчасын деле «Кымыз» деп эле жаздырсаңыз. Кымыз, кымыз бойдон эле таанылса.

2) Суроолорум: Жарманын, бозонун, кымыздын Кыргызстандын түрдүү аймактарында жасалуу өзгөчөлүктөрү бар. Мен өзүмдүн кичи- мекеним Кара-Кулжа районунун Алайкуу зонасынын кымыз, жарма, аш, бозо жасоонун, эт сүрсүтүүнүн өзгөчө технологиялары бар. Кыргызстандын ар бир аймагында башкаларга окшобогон өзгөчүлүктөрү бардыр. Сиз, жана жубайыңыз Жаңылмырза ушул жактан дагы изилдөө жасап, рационуңуздарды толуктоого кандай карайсыз?

3) Кайрымдуулук жасоо-дүйнөлүк практикада бизнес этикасынын бир өңүтү. Миндеген жумушчу ордун түзүүдөн башка, кандай кайрымдуулук иштерди жасайсыздар? Ошол тууралуу кеңири маалымат берсеңиз.

Этнокомплекс Супара. Жооп: Сайрагүл айым, “Кымыз” деген ат менен чыгуу сунушуңузду колдойм. Кыргыз суусундуктарын жасоодо бардык аймактын жасоо ыкмасын изилдеп, рыноктун талабына жараша көпкө сакталуучу жаңы технологияны иштеп чыкканбыз. Үчүнчү сурооңуз боюнча айтсам, кайрымдуулук иштерибизди атыбызды чыгаруу үчүн жасабагандыктан, жарыя кылгым келбейт.
Сайрагүл МАТИКЕЕВА: Рахмат! Дагы, дагы ийгиликтерди, бийиктиктерди каалайбыз!

Этнокомплекс Супара: Эгерде кыргыздын унутулуп бараткан тамактарынын рецептерин билсеңиз, биз дайыма ачыкпыз.

Ширин ИСКАКОВА, Алматы шаарынан, Казахстан. Саламатсызбы Таабалды байке. 20 кылымда «Кока-Кола» дүйнөлүк бренд болгондой эле менин кыялымда сүйүктүү суусундугум «Шоро» 21 кылымдын дүйнөлүк бренди. Менин кыялымды ишке ашыра аласызбы?
Этнокомплекс Супара. Жооп: Ширин айым, дүйнөлүк бренд болбосо да, СНГ чөлкөмүндө белгилүү болот деген тилегим бар. Ишке ашыруу аракети жүрүп жатат.

Айтмырза АБЫЛКАСЫМОВ: Бишкек шаарынан, КР. Кеч жарык, урматтуу Таабалды мырза! Сиздин чыгаан журналист жана чыгармачыл инсан экендигиңиз жалпы журтка мурдатан эле жакшы аян. Бирок, кийинки кезде публицистика менен шугулдангандан көрө бизнести өркүндөтүүгө көбүрөөк ооп кеткен жайыңыз бар. Анткен менен азыр деле кээде жаза койгондоруңуз ММК ларда жарык көрө калат…

Эми суроо: Мына ушундай жагдайдан алып караганда Сиз ушул эки салаанын кайсынысынан өзүңүздүн жеке жан дүйнөңүзгө көбүрөөк (материалдык жагы го түшүнүктүү) руханий канагаттануу ала аласыз? Баса, эмне үчүн бизнеске жаңы киришерде кыргыз суусундуктарын тандап алдыңыз? Бул Сиздин улутту сүйгөн мекенчилдигиңизден кабар береби, же кыргыздын улуттук суусундугу (мисалы: максым, жарма) башка улуттагыларга (ошонун ичинде кыргыздарга деле) оргиналдуу көрүнүп, бат акча жасаганга мүмкүнчүлүк берет деген ойдо болгонсузбу?
Жоопторуңуз үчүн алдын ала чоң ырахмат! Ишиңиздерди дайма оомат жылоолосун!

Этнокомплекс Супара: Жооп: Айтмырза мырза! Сиз жүрөктөгү жараны чукудуңуз. Мен өзүмдү бизнесмен катары эмес, чыгармачыл жазуучу адам катары жакшы сезем. Мен жасап жаткан бизнес иштерим деле баардыгы идеяга жана чыгармачылыкка негизделген. Улуттук тамак-ашты, улуттук маданияттын чоң бөлүгү катары сактап калуу идеясы мени «Шоро» менен «Супараны» түзүүгө түрткү берди. Мен «Шорону» да, «Супараны» чыгармачылык чоң ыракат менен куруп чыктым, бирок аларды башкаруу маселесине такыр катышпайм. Андан тышкары чыгармачылыкка кайтып бир чоң китеп жазсамбы деген тилегим мени сооротуп келет. Азырынча «Чуңкурчак» деген жайлоодо «Супарадан» кем эмес эс алуучу жай куруп жатам.
Айтмырза АБЫЛКАСЫМОВ: Жоопторуңузга дагы бир ирет ырахмат, максаттарыңыздын ишке ашышына Жараткан жардам берсин!

Динар ИМАН. Истанбул шаарынан, Түркия. Саламатсызбы агай! Жарманы алгач сизге «апаңыз казанга жасап берип анан саттык» деп калаар элеңиз.. Ошол убактан бери сиз уй-бүлөңүз менен Кыргыз элине жакшы кызмат кылып келе жатасыз. Шоронун алгачкы тарых-таржымалы тууралуу айтып берсеңиз?
Этнокомплекс Супара: Жооп: Динара кандайсың, сен аны баарынан жакшы билесиң да..

Райкүл АЙДАРАЛИЕВА, Бишкек шаарынан, КР. Саламатсызбы Таабалды агай? Менин оюмча сизде ушул тапта баардык мүмкүнчүлүктөрүңүз бар деп ойлойм. Акыл, байлык жана да бийликке сөзүңүз өтөт дегендей. Суроом: Эс алганы балыкка ууга чыктыңыз. Торуңузга алтын балык түшүп калды. Алтын балык жалынып, жалбарып, «каалаган 3-тилегиңди айтыңыз да мени кое бериңиз, бирок тилектериң жалаң кыргыз эли, кыргыз тили, кыргыздын келчеги тууралуу болсун» десе Сиз кандай суроо берет элеңиз?
Этнокомплекс Супара: Жооп: Райкүл айым, 1. Кыргыз эли жалкоолуктан, ичи тардыктан, көрө албастыктан арылсын: 2. Кыргыз тилин сактоо үчүн да, өнүктүрүү үчүн да Шайлообек Дүйшеевдин «Агындыларындай» китептер көбөйсүн: 3. Карызы жок мамлекетке айланалы.

Айкөкүл СҮЙҮНОВА. Кызыл – Кыйа шаарынан, КР. Таабалды агай, сиз жасаган иштер чындыгында эле анча-мынча адамдын колунан келе бербейт. Дегеним, кыргыз элинин улуттук баалуулуктарын сактоого, жайылтууга, кийинки урпакка өткөрүп берүүгө зор салым коштуңуз. «Ар кандай күчтүү эрекектин артында андан да күчтүү аял турат. Ал – анын апасы же аялы» – деген экен бир аалым. Ушул сөздүн сиздин жашооңузга, жасаган иштериңизге, ийгиликтериңизге тиешеси барбы?

Этнокомплекс Супара: Жооп: Айкөкүл айым, Сиз туптуура айттыңыз. «Шоронун» башталышына апам Сүйүндүн чоң тиешеси бар. Кичинемден үйдө максым жасалбаган күн болгон эмес. Шаарга келгенде күндө ичкен максымды сагынып, суусундук жасоо идеясы пайда болгон. Биринчи казан максымды да Апам өзү жасап батасын берген. «Супараны» курууда жубайым Жаңылдын жардамы чоң. Ички жасалгалоо жана башкаруу маселеси толук жубайымдын мойнунда.
Жылдыз ЖАЛИЕВА, Бишкек шаарынан, КР. Саламатсызбы Таабалды мырза! Келе жаткан Нооруз майрамыныз менен куттуктайм! Суроом: 1. Дүйнөдө белгилүү бизнесмендердин көптөгөн кыйынчылык менен ушундай даражага жетишет. Алар бизнесте көп кыйынчылык каалайм деп айтышат эмеспи. Сиз дагы алар сыяктуу эле башыңыздан канчалаган кыйынчылыктарды өткөргөндүрсүз, дегеле ийгилигиңиздин сыры эмнеде? 2. Жаштарга тажрыйбанызды кантип бөлүшөсүз?
3. Атадан кем, атага тең, атадан артык уул деген жакшы сөз бар эмеспи. Сиз кайсынысына киресиз? Сизди урматтоо менен Жылдыз!

Этнокомплекс Супара: Жооп: Жылдыз айым, биринчи сурооңузга жооп берсем, оңой оокат жок. Кыйналбай жеткен ийгиликтин келечеги жок болот. Ийгиликтин башаты коюлган максаттан башталат. Максатка жетүү жолу канчалык кыйын болсо, жашоо ошончолук кызык болот: 2. Жаштарга айтаарым китепти көп окуп, билим алышсын. Мен көп окуган адаммын. Дүйнөлүк адабиятты, философияны чоң кызыгуу менен 15 жыл тынбай окугам. Азыркыга чейин ошол алган билимим мага жардам болуп келет: 3. Адам катары мен атама жете албасам керек, 60 жашка келсем да 12 жашымда дүйнөдөн өткөн атамдын элеси мени колдоп да, оңдоп да келет.

Хатира АСАНОВНА. Бишкек шаарынан, КР. 1. Таабалды агай, Жусуп Толтоевди “Шоро” компаниясынын жарнамалык жүзү катары жакшы билебиз. Кандайча жана ким тарабынан сунушталган? 2. “Супара” этно-комплекси шаардан канчалык аралыкта жайгашкан? 3. “Супара” этно-комплексинин аянты канча?.
Этнокомплекс Супара: Жооп: Хатира айым, Жусуп Толтоевди реклама тарткан компания сунуштаган. Супара шаардан 3 чакырым аралыкта жайгашкан. Аянты 3 гектар.

Чынара САРБАГЫШОВА: Бишкек шаарынан, КР. Кутман Кеч Таабалды агай! Бала кезде сиздин ырларды окуп таасирленген убактар болчу эле. Мен кызыккан суроолордун жообун дээрлик уктум. Мексиканын «Байлар да ыйлайт» деген сериялы сыяктуу жашоодо сынып, ыйлаган күнүңүз болду беле? Ошондой эле эстен кеткис бактылуу көз ирмем.

Этнокомплекс Супара: Жооп: Чынара айым, мен ыр жазган эмесмин, бирок макалаларды көп жазчумун. Мен канчалык кыйналган сайын ошончолук чыйралып, өзүм таңкалгандай кошумча күч кубат пайда болот. Эч качан сынган эмесмин. Бактылуу көз ирмем көп эле болот. Чоң балык кармап алсам да өзүмдү бактылуу сезем.

Аида ТОКОНОВА, Оруссиядан: Саламатсызбы Таабалды аба! Эң алгач, Сизди заманыбыздын көрүнүктүү инсаны, мыкты ишкери катары көрүп, өзүмдүн терең сый-урматымды күбөлөндүрөм. Ушу жүрүшүңүздөн жазбай, элиңизге улуттун генофондун сактап саламаттыгын чыңдоодо, ата-бабаларыбыздын «отко күйбөс, сууга чөкпөс» мурастарынын бири болгон улуттук даамдарын урпактарга таанытып, үзүрлүү эмгектенип, зор салымыңызды кошуп, элиңиздин эң кадыр-барктуу азаматтарынан болуп жүрө бериңиз!

Менин Сизге эки суроом бар: 1. Адам баласынын организминин 60 пайызы суудан тургандыктан, тамак-ашсыз 5 күн жашай алса да, суусуз 3 күн да чыдабайт, ар дайым сууну талап кылып турат эмеспи. Ал суусундукту да пайдалуу заттар менен байытып чыгарган – Сиздердин бизнестин эң негизги стратегиялык туура багыты деп билем. Ошол эле учурда Сиздердин бизнестин негизги ою (концепциясы)– бул нукура улуттук (!) таза, пайдалуу суусундуктарды бардык технологияларын сактап чыгаруу эмеспи, жаңылбасам. Ушул жерден менин суроом: Сиздердин ишкананын негизги оюна (концепциясына) таянып, Кыргыз элинин дагы бир уникалдуу заты болгон – Күлазыкты кайра жаралтуу жөнүндө ойлонуп көргөнсүздөрбү? Заманыбыздын шартында бул азык-түлүк эл арасында абдан актуалдуу, пайдалуу жана өтө популярдуу болмок деп ойлойм.

2. Сиздердин ишкананын баалуу кагаздарына (акция, облигация) ээ болуунун шарттарын кененирээк айтып бересизби? Урматтоом менен, Аида Токонова!

Этнокомплекс Супара: Жооп: Аида айым, Суу бизнеси тууралуу туура баа бердиңиз. Күлазык тамагынын технологиясын көптөн бери издеп жүрөм. Азыркы замандын талабына ылайык рецептин үстүндө иштеп жатабыз. Облигация тууралуу кенен маалыматты башка учрда жооп берейин. 2 жолу чыгарып, бардыгы сатылып кетти.

Аида ТОКОНОВА. Чоң ырахмат, Сизге! Ишиңиз илгерилей берсин! Биздин демдер, колдоолор Сиздерге Күлазык болсун!

Бермет БАЙКЕЛОВА, Нью-Йорк шаарынан, АКШ. Саламатсызбы! Сиздин эң жакшы көрүп, көп колдонгон сөзүңүз, Кандай адаммын деп ойлойсуз кээде, өзүңүздү өзүңүз? Алдын ала ырахмат, байке! Сизге кааларым: Узун өмүр, чың ден-соолук, ийгилик, жана да ар дайым дал ушул сүрөттөгүдөй көзүңүз күлүп турсун! Урматым менен Бермет!

Этнокомплекс Супара: Жооп: Бермет айым, «ар бир адамдын тагдыры өзүнүн гана колунда» деген сөздү көп айтам. Мен өзүмдү калыс адаммын деп ойлойм.
Ширин ИСКАКОВА, Алматы шаарынан, Казахстан. «Супара» этно-комплексине Бишкектин мектеп окуучулары экскурсияга барышабы, өзүңүз окуучуларды чакырып турасызбы?.

Этнокомплекс Супара: Жооп: Ширин айым, кезек кезеги менен мектеп окуучуларына экскурсия жасап турушат жана кыргыз тарыхы , кыргыз тили сабактарын да өткөзүп турушат

Асыран АЙДАРАЛИЕВ, Келсинки шаарынан, Финляндия: Атсаломалейкум Таабалды мырза, биздин Мамлекеттик тилдин тагдырына кандай карайсыз жана анын өнүгүшүнө кандай кескин чараларды көрсөк болот. Канчалык какшаганыбыз менен өсүп-өнүкпөй эле кетенчиктеп баратканы байкалууда. Орусча сүйлөгөндөрдү эч ким деле тыйган жери жок, бирок жалпы коомду кандай жол менен Эне тилге болгон мамилесин өзгөртө алабыз. Сиздин ушуга болгон көз карашыңызды билгим келет.

Этнокомплекс Супара: Жооп: Асыран мырза, Сиз өтө оор суроо бердиңиз. Кыргыз тили кыргыз элине эле керек. Менин оюмча, тилди өнүктүрүү үчүн кыргыз тилинде: окуган адамды кызыктырган жакшы китептер чыгыш керек: кино, теле, мультфильмдер болуш керек: Тилдин өнүгүшүнө жаңы түшүнүктөрдү дайыны жок кыргызчалай берген жалган патриоттордун пайдасынан зыяны көп болуп жатат. Кээде кээ бир макалаларды окуганда мен дагы түшүнбөгөн сөздөрдү окуп жиним келет. Жарнамаларды окуп боорум эзилген учурлар болот, меселен, «металлочерепица» деген сөздү «темир карапалар» деп которуп жарнама беришиптир. Чет элдин таасири менен пайда болгон сөздөрдү кыргызчалап тамтандабай, оригиналында эле колдонуш керек деп ойлойм. Мисалы, канча убакыттан бери үн алгы, сын алгы деп жазып, айтып да келе жатышат, бирок бири-бири менен сүйлөшө келгенде телевизор, радио деп эле айтылып келе жатат.

Мирбек КЫРГЫЗСТАН, Кара-Кулжадан, КР. Саламатсызбы Таабалды мырза! Мен төмөндөгү маселелер боюнча Сиздин атуулдук позицияңызды билгим келет.

1. Орус тилинин биздин өлкөнүн башмыйзамындагы расмий тил статусу бизге канчалык зарыл?

2. Бажы биримдигине кошулуу биздин эркиндигибизди чектейт дегенге кошуласызбы?

3. (Сунуш катары) Ак эмгеги менен ийгилик жараткан, тажрыйбалуу ишкер катары, окуу жайларында окуп жаткан жаш студенттерге өзүңүз билген бизнес тууралуу алымсабактарды өтүп турасызбы (жаштарга кесипти туура тандоосу, кандайдыр бир иш баштоосу үчүн реалдуу жардам болмок) Иштериңизге ийгиликтерди, бакубат ден-соолук каалап Мирбек. Сиз жайылткан «Максым Шоро» үчүн чооң рахмат! Анчалык жайылбаса балким биз дагы эле «газдалган суу» ичип жүрмөкпүз.

Этнокомплекс Супара: Жооп: Мирбек мырза, орус тилинин зыянын көргөн кыргызды көрө элекмин. Дүйнөлүк элдердин руханий, илимий, маданий байлыктары менен кенен таанышуунун жалгыз жолу (азырынча жана келечектеги 50 жылга чейин) орус тили болуп эсептелинет. Ал эми ал тилдин расмий болуп турушу азырынча элибиздин көпчүлүгү Россияда иштеп, бизди багып жүргөн заманда туура эле нерсе экенин Украинадагы окуялар далилдеп турат. 2. Бажы биримдигинин бизге пайдасы да бар, зыяны да бар. Кайсынысы көбүрөөк экенин айтыш кыйын. Биз бажы биримдиги жок эле эркиндигибиз көп маселелер боюнча чектелген элбиз. Манастын тукумубуз, илгерки элбиз деп төшүбүздү койгулап, оозубуздан көбүк чыгара мактанабыз дагы бүт дүйнөдөн кайыр сурап жүрөбүз. Менин оюмча, кыска мөөнөттө бажы биримдиги бизге зыян алып келет, ал эми узун мөөнөттө пайда алып келиши мүмкүн. 3. Студенттер менен жолугушуу өткөзгөн учурлар көп эле болот. «Максымдай» суусундукту жаратып кеткен ата-бабаларга чоң ыракмат айткым келет жана аны өндүрүшкө салган тагдырыма ыраазымын.

Мээрим ЖАБУЕВА, Бишкек шаарынан, КР. Саламатсызбы Таабалды агай! Жогоруда Көчмөндөрдүн суроолоруна, сиздин берген жоопторуңуздун негизинде бир топ маалыматтарды алдым. Эми, келип эле кыргыз тилине токтолгум келди. Жеке ишканаларыңыздын иш кагаздарын кыргызчалатууга кандай карайсыз же кыргызчабы? Ошондой эле, «Супара» этно-комплексиндеги илгерки оокаттарды, буюм-тайымдарды кантип таптыңыз же кандай жол менен чогулттуңуздар эле?
Этнокомплекс Супара: Жооп: Мээрим айым, финансылык эсеп-кысап иштери орус тилинде гана түзүлгөн атайын программалардын негизинде жүргүзүлгөндүктөн жана биздин кардарларыбыздын көпчүлүгү орус тилинде иш жүргүзгөндүктөн айласыздан иш кагаздарыбыз орус тилинде. «Супара» жаңы башталганда өзүмдүн айылымды кыдырып, сакталып калган эски оокаттарды жыйнап келгем. Муну эмне кыласын дешип туугандарым таң калган. Кийин «Супарага» көп адамдар сунуштап келишет. Мен кечигип калыптырмын, укмуштай баалуу эски буюмдар четке чыгып кетиптир. Биздин Мамлекеттик музейде турбаганына өкүнөм.

Алтынай ДҮЙШЕЕВА, Маскөө шаарынан, Оруссия. Саламатсызбы, мага чейинкилер, кийинкилер саясат бойунча суроо беришээр, менде жөнөкөй гана суроо. Сизди, Таабалды кылып тааныткан, талкан «Шоро» жөнүндө сурагым келди. «Шорону» өтө сүйөм, фигурамды бузгандардын бири да ошол. Өткөндө бирөө айтат, составына суусата турган кошулма пайдаланат экен деп. Ушул чынбы? «Кошом» – десеңиз деле сүйүп иче берем. Жообуңуз үчүн алдын ала ыракмат, элиңиз үчүн эрикпей эмгек эте бериңиз, ден-соолук каалайм!
Этнокомплекс Супара: Жооп: Алтынай айым, «Шорого» эч нерсе кошпойбуз, даамдуу оокат ошентип тилентип турат. «Шоро» арпадан жасалат, арпа адамдын фигурасын бузбайт.

Гүлжакан МАВЛАНОВА, Бишкек шаарынан, КР. «Кыргыз Көчүнүн» кыргыз тили үчүн күйүп-бышып жүргүзгөн идеялары сизге жагабы? Жылына бир жолу «Көчкө» демөөрчү болуп бере аласызбы?
Этнокомплекс Супара: Жооп: Гүлжакан айым, «Көчмөн» болуп жүрсөңөр дагы жөн жүрбөй адамдарды ойлонтууга татыктуу маселени көтөргөнүңөр мага албетте жагат. Демөөрчүлүк боюнча көптөр кайрылат, эгер татыктуу иш чара болсо жардам берем.

Аида Ахмад ЖАМАЛ, Абу-Даби шаарынан, БАЭ. Саламатсызбы Таабалды Байке! Иштериңиздин мындн ары да өркүндөп өсө беришине тилектешмин. Менин суроом: Кыргызстандагы орто жана чакан бизнести өркүндөтүү боюнча Мыйзамдар жана алардын шарттары Сизди канчалык деңгээлде канааттандырат? Эгер ушул мыйзамдарга өзгөртүү же болбосо кошумча талап кылына турган болсо Сиз тараптан кандай сунуштар киргизилет эле?
Этнокомплекс Супара: Жооп: Аида айым, бизде орто жана чакан бизнести өнүктүрүү боюнча мыйзамдар жана шарттар коңшу мамлекеттерге караганда бир кыйла жакшы.Мыйзам жазуулуда ишкерлер менен кеңешип, алардын сунуштары эске алынса жакшы болмок.

Асыран АЙДАРАЛИЕВ, Келсинки шаарынан, Финляндия. Таабалды мырза, мен сизге кыскартымыш болуп туруп эки суроо берейин дедим.

1. «Кыргыз Көчү» мекенчилдер тобу бир жарым жылдан ашык убакыттан бери маданият, адабият жаатында дагы бир аз маселелерге тиш салып, топтун мүчөлөрүнүн демилгеси менен аздап болсо дагы демөөрчүлүк кылуу менен акындардын китебин чыгаруу жана башка өтө маанилүү делген сынактарды уйуштуруп келет. Андай иш чараларыбызды тынбай улантуудабыз. Айтайын дегеним, учурда бизде басмага дапдаяр турган өтө уникалдуу «Кыргызча-англисче» сөздүк бар. Ошол сөздүктү кандай жол менен жарыкка чыгаруунун жолун издеп жаткан кербезибиз. Өзүбүз дагы аздап каражат топтоп баштаган элек. Азыркы жаштарыбыздын, дегеле дүйнөлүк тилге айланган англис тилин үйрөнүүдө кыргыз коомчулугуна мындай сөздүк аба менен суудай эле керек деген тейде кыргыздын келечегине кайдыгер карабаган, демөөрчүлүк кылган ишкерлер болсо, ошондой адамдарды таап, ортомчулук ирээтинде көмөк көрсөтүп, жардам бере аласызбы?.

2. Аз күн мурун арабызга келип кошулган Эл акыны Шайлообек Дүйшеевдин «Агындылар» аттуу китебине сиз баш сөз жазган экенсиз. Албетте мен ал китепти окумак турсун көрө да элекмин. Китеп жөнүндө сиздин пикириңиз?. Кечээ да сөз арасында кыстара кеттиңиз, ушу китепти жана ушуга окшогон маани-маңыздуу китептерди жогорку деңгээлде байма-бай бастырып, тааныш билиш менен тар чөйрөгө эле таратып тим болбостон жалпы элдин арасына, жалпы кыргыз аймагында жашаган китепти сүйүп окуган окурмандарына жеткирүүнүн кандай механизмдерин иштеп чыкса болот?. Дегеним, өлөсөлүү болуп турган Эне тилибиздин өркүндөп-өсүшүнө кандайдыр бир деңгээлде пайдасы тиет беле?.

Этнокомплекс Супара: Жооп: Асыран мырза, мен жоопту экинчи сурооңуздан баштайын. Сөздүк чыгарасңбы, китеп чыгарасынбы азыркы жашоонун шартында ал коомдун талабына туура келсе, демөөрчүсү жок эле өзүн актайт. Менин бул пикиримди Шайлообек Дүйшеевдин «Агындылар» деген китебинин тагдыры далилдей алат. Менин оюмча, кыргыздын адабий тарыхында мындай кызык окулган, жеңил окулган, окуган адамдын жүрөгүн жылытып ойго салган, бир ыйлатып бир күлдүргөн, бүтүндөй бир, жарым кылымдык эпоханы толук камтыган кыргыз тилинин- тереңдигин, кооздугун, ийкемдүүлүгүн, кенендигин али эле эмес музыкалдуулугун чагылдырган мындай китеп чыга элек эле. Азыр ал китептин биринчи чыгарылышы түгөнүп, экинчи басылышы чыкканы калды. Китепти окурмандар бири-биринен угуп, кымбатына карабай сатып алып атышканы адабиятыбыздын келечегинин бар экенинен кабар берет. Шакемдин китебин өзгөчө сыртта жүргөндөр тилди унутпаш үчүн сөзсүз окуш керек деп эсептейм, себеби кайра-кайра окуганда Куран сыяктуу тажатпай окулган мындай китепти окуй элек болчумун.

Этнокомплекс Супара: Асыран мырза, биринчи сурооңузга жооп берсем, ал өзүн актабаса андай сөздүктү чыгарып да кереги жок. бекер оокаттын баркы жок деген сөз бар.

Алтынай ТЕМИРОВА, Бишкек шаарынан, КР. «Шоро» – «Манастын суусундугу» деп, кыргыз жармасынын да, апаңыздын да атын чыгардыңыз. Улуттук ашкана ачып, ага унутулган сонун атты таап «Супара» атап – аялыңызды чексиз бактылуу кылдыңыз. Экөө тең супер болду, чыныгы Мырзалыгыңызды көрсөттүңүз. Эми, элдин баары чыныгы Эр Табылды дегидей эмне ойлоп таап, эмне иштерди жасаар экенсиз – ошондон кеп салып койбойсузбу?
Этнокомплекс Супара: Жооп: Алтынай айым, мен калган өмүрүмдү чети оюла элек, бирок потенциалы эбегейсиз чоң тоо туризмин өнүктүүрүгө арнагым келет. Ошонун биринчи этабы катары Супара Чуңкурчак деген ажайып жайында кымыз ичип, кышында лыжа тээп эс алуучу жерди куруп жатам. Бишкектен 30 чакырым алыстыкта.

Нурланбек КАЛДЫБАЕВ, Ош шаарынан, КР. Саламатсызбы Таабалды мырза!
Сиздин кыргыздын улуттук баалуулуктарын даңазалоо жаатындагы аракеттериңиз жана ишкерлик чөйрөсүндөгү жетишкендиктериңиз менен биз, жөнөкөй кыргыздар да сыймыктанганга негиз бар. Ал эми азыр болсо, Асыран байке түзүп берген жагымдуу мүмкүнчүлүктөн пайдаланып, Сизге бере турган суроолорум төмөндөгүчө.
1. Элибиздин ички көрөңгөсүнө, улуттук потенциалдык мүмкүнчүлүктөргө негизделген жаш ишкерлердин мектебин түзүп, өз тажрыйбаңызды жайылтуу тууралуу ой-пландарыңыз барбы?
2. Өзүңүз билгендей азыркы күндө дүйнөдө компьютердик технологиялар биринчи орунга чыкты. Бирок, менин оюмча, биз кыргыздар азырынча прогресстин бул жетишкендигин толук кандуу пайдалана албай жатабыз. Көпчүлүгүбуз Виртааламды оюн-зоок катарында кабылдасак, ал эми жаш балдарыбыз атыш-кырыш сыяктуу коркунучтуу оюндарга көп берилип жатат. Ошондуктан менин сунушум бар эле, кыргыздын улуттук өзгөчөлүктөрүн жайылтуу жана жаш муундарды мекенчилдик, жаратылышты сүйүү нугунда тарбиялоо максатында жаңы компьютердик оюндарды, программаларды түзүп чыгуу боюнча ( мисалы: боз үйдү куруу оюну (Тетрис сыяктуу), “Жайлоодо мал багуу” компьютердик оюну (ж.б.у.с.) , бул идеяларды ишке ашырууну колдоого алаар белеңиз?
3. Жогоруда жазганыңыздай, чыгармачылык чөйрөгө кайрылсаңыз кайсы темада китеп жазаар элеңиз, айтайын дегеним, бүгүнкү күндөгү кыргыз коомчулугунун кайсы көйгөйлөрү сизди көбүрөөк түйшөлтөт?
Этнокомплекс Супара: Жооп: Нурланбек мырза, ар ким өзүнүн колунан келген жана өзүнө жаккан гана ишти жасай баштаганда элибиз оңолот деп ойлойм. Сенин сунуштарын мени кызыктырбайт. 3.Эмне жазаарымды өзүм да билбейм. Китептин мазмуну жаза баштаганда өзүнөн өзү өсүп чыгат. Мурдатан план түзүлүп жазылган китеп-өлүк китеп.

Гүлсана САРНОГОЕВА, Фолиньо шаарынан, Италия. Урматтуу Таабалды мырза, мени кызыктырган бир эле чакан суроом бар. «Шоро» ден-соолукту чыңдоо үчүн кандай таасирин тийгизет?
Этнокомплекс Супара: Жооп: Гүлсана айым, ушул суусундуктарды ичкен ата-энелерибиздин ден-соолуктары, азыркы жаштардан бир кыйла чың экени «Шоронун» пайдалуу экенин далилдеп турса керек.

Канат МУРЗАКУЛ, Истанбул шаарынан, Түркия. Таабалды мырза, саламатсызбы? Сизге Түркиядан кайрылып жатам. Сиз өндүрүп чыгарган суусундуктарды чаңкап турганда, каалаган учурда иче албайбыз чет элде болгонубузга байланыштуу, тилекке каршы. Анан бизде, башкача айтканда Стамбул шаарындагы кыргызстандык ишкерлер ортосунда Шоро өндүрүү боюнча пикир туулду эле. Өзүбүздүн жарандарга, жадагалса түрктөргө биздин шоро, чалап жана кымызды ичирип аны таанытуу тууралуу ниетибиз бар. Бизге кандай жол-жобо, ой-сунуштарды сунуштаар элеңиз? Кыла алабызбы, туура жолу кандай болуш керек бул демилгенин? Алдын ала рахмат сизге..
Этнокомплекс Супара: Жооп: Канат мырза, Сиздин ойду ишке ашыруу үчүн чоң каражат керек. Каражат тапсаңар ойлонсок болот. Мен өз каражатымды Кыргызстанга гана салам.

Каныкей ЖАНЫБЕКОВА, Ноокен районунун Сакалды айылынан, КР. Саламатсызбы агай! Сиздин ийгиликтериңизге атаңыз, апаңыз эң алгач кандай кубанганын эстей аласызбы? Ошондой эле Сиз дагы балдарыңыздын ийгиликтерге жеткен учурунда кандай кубандыңыз эле?
Этнокомплекс Супара: Жооп: Каныкей айым, мен 2 жаш курагымда ата-энемди каратып коюп,кичинекей чемодандын үстүнөн секирип түшкөн эрдигиме алар кубангандан тажашчу эмес, мен секиргенден тажачы эмесмин. Балдарымдын адам болуп өсүп келе жаткандарына кубанам.

Азирет КЕЛДИБАЕВ, Санкт-Петербург шаарынан, Оруссия. Ассалом алекум агай; сак-саламатсызбы? менин суроом: Сиз “шоро” фирмасын ачаарда Ар кандай тоскоолдуктар болбой койсо керек,бирок сиз ошол тосколдуктарды жеңип өттүңүз.азыр эми биздин өлкөдө идеясы курч көп жаштар бар бирок ошолор тоскоолдуктарга келгенде эмне кылышын билбей калып жатышат.сиз өзүңүздүн баштан өткөн тосколдуктарды кантип жеңгениңиз жөнүндө илимий изилдөө жүргүзүп чакан китеп кылып жазсаңыз болобу? себеби сиздин үлгүңүз жаштарга аябагандай чоң түрткү бере беле деген ой.
Этнокомплекс Супара: Жооп: Азирет мырза, мен коп тоскоолдуктарга туш болгом, болуп да келе жатам, жеңип да келе жатам. Жаза турган китебимде бул маселелер толук камтылат. Жашоонун өзү-бул тоскоолдуктар менен күрөшүү болуп эсептелинет.Билими бар миңди жыгат жана чыдамкай,өжөр адам гана жеңишке жетет.

Расул САЛАЙДИНОВ, Кочкор районунан, КР. Таабалды байке, Сиз жөнүндө интернеттен карап отуруп, мурда берген интервьюңузду окудум. Ал жерде сиз Бажы биримдигине эч коркпостон эле кошулуу керек депсиз. Чын эле бажы биримдигине кошулуудан Кыргызстан зыян тартпайбы?
Этнокомплекс Супара: Жооп: Расул мырза, мен бул суроого жогоруда жооп бердим. Албетте адегенде зыян тартат. Кийинки пайдасына кыскача токтолсом: 1. Азыр бизди багып жаткан, Россияда жүргөн мекендештерибиздин ал-абалы оңолот: 2. Айыл-чарбалык товарларыбыз экспорттолот:
3. Биздин таланттуу жаш ишкерлерибиздин жайыты кеңейип, алар Россиянын компанияларында чоң кызматтарында иштеп башташат: 4. Бизге Россиядан чоң инвестициялар тартылат. Чегирткеден корксоң эгин экпе деген эле кеп..

Ширин Искакова, Алматы шаарынан, Казахстан. Саламатсызбы! Таабалды мырза, кайсы спорттун түрү менен машыгасыз, ден-соолукка профилактика үчүн эмнелерди кыласыз?. Сүкүт (медитация) кыласызбы?. «Осознанность» жөнүндө эмне айта аласыз? Анан дагы, энергияңызды кантип топтойсуз?
Этнокомплекс Супара: Жооп: Ширин айым, чынымды айтсам, өлгүдөй жалкоомун, спорт менен машыкпайм, медитация кылбайм, бирок генетикалык ден соолугум жакшы. Жакында бир эрдик кылдым, тамекини таштадым. Жумушта келери-кечке басып жүрөм. Кыймыл аракет көп.

Тынчтык БЕК, Ош шаарынан, КР. Арыбаӊыз Таабалды ава! Ден-соолук, иштериӊиз жакшыбы? Менин берейин деген суроолорум төмөндөгүчө:
1. Бир убактар Кытайдын кыргыздар жашаган Артыш шаарында да сиздердин чыгарган суусундуктар сатылып, ал жактагы боордошторубуз менен тек гана руханий маданият алмашуу эмес, материалдык маданият алмашуу да болгон эле. Азыркы учурда ал жакта сиздердин суусундуктар неге сатылбай калды? Суусундуктун өтүмү кандай болду эле? Жабылып калышына эмнелер себеп болду дегендей…
2. Түштүк борборубуз болгон Ош шаарында да сиздин «Супараӊыз» сыяктуу орун ачылышы керек деп ойлойм. Балким филиалын ачуу оюӊузда бардыр? Сизди тереӊ урматтоо менен, Кыргыздын дагы бир кулуну Тынчтык Бек.
Этнокомплекс Супара: Жооп: Тынчтык мырза, бардыгы жакшы. Бул рынокту тандоодо саясий чечим болуп калды. Кытайлык кыргыздар Биз Шорону курганда абдан сүйүнүшкөн. Бирок экономикалык жактан туура эмес жер тандалып калганына байланыштуу жабылып калды.экинчи суроонуз боюнча айтсам, убакыт көрсөтөт.

Темирлан АКНАЗАРОВ, Бишкек, шаарынан, КР. Ассаламу алейкум, негизги суроом мындай:
Улуттук оюндарыбыздын бири болгон ордого оюңуз кандай? Анан кыстырма суроом, тогуз коргоол казак туугандар менен талашта жүргөн ойундардын катарында, эгер муну улутташтыруу боюнча сунуш түшсө кандай салым кошор элеңиз. Ошондой эле бул ойунду өзүңүз кызыгып ойнойсузбу? Рахмат.
Этнокомплекс Супара: Жооп: Темирлан мырза, ордо оюнун жакшы көрөм. Жаш кезде көп ойногом. Тогуз коргоолду ойногон эмесмин. Кеп тогуз коргоол кимдики экенинде эмес, ал оюндун чемпиону кайсы элден чыкканында.
Tемирлан АКНАЗАРОВ. Кечиресиз Таабалды байке, жогорудагы суроом бойунча кошумча дагы суроо бергим келди: Бүгүнкү күндө Ордо ойуну бойунча уйуштурулуп жаткан иштер Сизди канааттандырабы?
Этнокомплекс Супара: Жооп: Темирлан мырза, канааттандырбайт. Туруктуу ордо ойной турган жабык орду жок. Ордо ойной турган жайды өз каражатыма куруп бергим келет, бирок мамлекет жер бөлүп бербейт.

Жыргал БОТОБАЕВА, Бишкек шаарынан, КР. Саламатсызбы! Сиздин «Супара» этно-комплексти көрүп кубанбаган, алкабаган кыргыз жок болсо керек!
1) Жаны «Чуңкурчактын» «Супарадан» айырмаланган жактары кандай жана ага кетчу жолду дагы оңдоого даярсызбы?
2) «Супара» комплексинде стилдешкен кыргыз боз үйлөрүн көрүп, балким келечекте, «чыныгы» (бардыгы байыркы кыргыздын жашоосун көрсөткөн) боз үйдү көрүүгө мүмкүн болобу? Совет доорунда жашаган бизге деле боз үйдөгү жашоону элестетүү кыйын, ал эми кийинки муундарга жомок болуп калды.
3) Акыркы жылдары өткөрүлүп жаткан «Бешбармак», «Кийиз» фестивалдары бизге келчү конокторду көбөйтүп, жаңы агымдарды пайда кылат деп ойлойм. Ушундай жөрөлгөлөрдү жыл сайын бир мезгилде, бир аймакта өткөрүүгө болобу?
4) Жалкоолукту кантип жеңесиз, жана кантип эргүү аласыз?
Этнокомплекс Супара: Жооп: Жыргал айым, Бааңызга чон ыракмат! Эми жооптор:
1. Чуңкурчактын Супарадан айырмасы, ал жомоктой кооз жайлоодо, токойдун четинде,тоонун боорунда 3 кабат боз үй жана ага жабыштырылган таш жер төлө түрүндө курулган ресторандан турат. Андан тышкары токойдун арасында жайгашкан бешик формасында жасалган мейманканалар менен тоонун бооруна курулган боз үй түрүндөгү мейманканалар болот. Келечекте жолду оңдо-түздөө иштери болот;
2. Супарада кийизден эң сапаттуу жасалган накта ата-бабалардан калган боз үй бар. Нооруз күнү түндүк көтөрүп конокторубуз менен бирдикте тигебиз.Келип катышып кетиниз! 3. Биз жыл сайын 21-мартта Бешбармак FEST өткөзүп турабыз; 4. Жалкоолук – кыргыздын жеңилбес душманы. Кыларга иши жок киши эле жалкоо болот. Жалкоолукту жеңүүнүн бир эле жолу бар – өзүңө жаккан иш табуу. Мурда китеп окуп эргүү алчумун, азыр диванга жатып, телевизорду көп тиктеп калдым. www.supara.kg Супара этно-комплекс www.supara.kg
Жыргал БОТОБАЕВА: Рахмат сунушуңузга! Нооруз майрамыңыз кут болсун, ишиңизге ийгилик! Бул жылы бара албаганыма байланыштуу, буюрса кийинки жылы.

Бахтияр БАЛТАБАЕВ, Бишкек шаарынан, КР. Ассалоому алейкум Таабалды аба. Менин суроом төмөндөгүчө: Мен азыр 35 жаштамын. Сиз 35 жаш убагыңызды эстеп көрбөйсүзбү.
Эмнелерди кыялданчуусуз? Кандай максаттарды ишке ашырууну көздөөчүсүз? Эмнелерге жетише алдыңыз эле? Канча балалуу болдуңуз эле? Кандай машинеде жүрчүү элеңиз? ж. б. ушул сыяктуу «ностальгия» кылып көрбөйсүзбү? Анан учурдан пайдаланып батыңызды алып калайын дедим эле.
Чын көңүлүңүздөн бата берип койосузбу? Алдын ала рахмат.
Этнокомплекс Супара: Жооп: Бахтияр мырза, мен 35 жашымда 1985-жылы троллейбуста эле жүрчүмүн. Айылым Суусамырга барганда жол тосуп, грузовиктин үстүнөн орун табылса сүйүнүп калчымын. Эптеп 4 баламды багыш үчүн бир жерде иштегеним болбосо, калган убакытымдын баарын дүйнөлүк адабиятты жана философияны окуганга жумшачумун. Досторум, жакындарым менин өзгөргөн мүнөзүмдү көрүшүп «Таабалды келесоо» болуп калыптыр деген ушак чыгарышыптыр. Эч кимге белгисиз бир бечара болчумун, бирок дымагым чоң болчу. Келечекте жазуучу болгум келчү. Мен орус адабиятын 28-жашымдан баштап окудум. 14 жыл тынымсыз күнү-түнү китеп окуганым үчүн 41 жашка чыкканда 1991-жылы 3 айдын ичинде Кыргызстанга белгилүү публицист болуп чыга келдим, Бахтияр! Батамды берейин, койгон максатына жетиш үчүн тынбай, чарчабай эмгек кылууга Кудай таалам сага күч-кубат берсин! Көксөгөн максатыңа жет! Оомийин!

Хатира АСАНОВНА, Бишкек шаарынан, КР. Саламатсызбы Таабалды ага? Ишинизге ийгилик каалайм! «Манас! Манас!» деп ураан чакырып, «Манастын урпактарыбыз!» деп сыймыктанып келебиз. Кыргызстандын кээ бир обулус, райондорунда орнотулган «Манас» атабыздын айкели көзгө толоорлук экен. Болгондо да борборубуз Бишкектин так ортосундагы айкели мамлекетибиздин алсыздыгын айгинелеп тургандай. Айкелдин да орношун карапайым эл көптөн-көп күтүшүп, жыйынтыгында көңүл тойбогон эле айкелди көрө алышты.
1. Айкелдин турпаты мамлекетибиздин абалын баамдап турабы? Сиздин ойуңуз?.
2. Каражатымды Кыргызстанга гана жумшайм дедиңиз. «Манас» атабыздын айкелин өз каражатыңызга орнотушуңуз мүмкүнбү?
3. Кыргызстандын кай жерине болбосун мечит салып бере алдыңызбы? Рахмат. Бар болуңуз! Урматым менен Хатира АСАНОВНА.
Этнокомплекс Супара: Жооп: Хатира айым, айкелдин турпаты мамлекеттин абалын баамдай албайт: 2. Сизге жана мага да жакпаган Манас Айкелин тургузганга жардам катары 500 000 сом которуп бергем: 3. Салсам мектеп салышым мүмкүн, бирок эч качан мечит салбайм, мечитке да барбайм, бирок мечитке барып жүргөндөрдүн көбүнө караганда менин Кудайга болгон ишенимим терең деп ойлойм. Кудайдын орду мечитте эмес, көкүрөктө.
Хатира АСАНОВНА. Жообуңузга терең ыраазычылык билдирем. Бар болуңуз!

Сан-марино өлкөсүндө (Италия). Бүткүл дүйнөлүк кыргыздардын форумунда. Апрель, 2013-жыл.

Сан-марино өлкөсүндө (Италия). Бүткүл дүйнөлүк кыргыздардын 2-форумунда. 2013-жыл, апрель.

Асыран АЙДАРАЛИЕВ. Келсинки шаарынан. Таабалды мырза, жыйынтыктайын деп жатып бир суроо эсиме түшүп кетти. Өткөн жылы Сан-Марино (Италия) өлкөсүндө болуп өткөн бүткүл дүйнөлүк кыргыздардын форумунда жолугушуп, чала-була баарлашып калганыбызда «буйурса сага, Финляндияга барам, экөөбүз черибиз чыккыча бир балык уулайлы» дедиңиз эле, мен күтүп жүрөм ошондон бери, качан келип каласыз?.
Этнокомплекс Супара: Жооп: Асыран мырза, чакырганыңызга чоң ыракмат! Балык кайсы маалда жакшы болот?
Асыран АЙДАРАЛИЕВ. Каалаган убакта бара берсе болот бул жакта..
Этнокомплекс Супара: Жооп: Асыран мырза, кабарлашып турабыз. Мен буйурса сөзсүз барам Финляндияга..
Асыран АЙДАРАЛИЕВ. Маакул, байланышта болобуз буйурса. Азыр эми жалпы эле «Көч Байланышка» көз салып карап отурган күйөрмандарыбызга эркин «микрофон» берейин дедим. Кысккача каалоо-тилек (суроо эмес) ирээтинде Таабалды мырзага саламдашуу жолдосоңуздар болот. Каалоочулар болсо эгер. Бизге бөлүнгөн убакыттан дагы 15 мүнөтүбүз бар урматтуу Достор! Ал эми башында Сиздер тараптан убада кылынган эң мыкты суроого бериле турган сертификатты Сиз өзүңүз эле аныктап туруп бизге кабарлап койоорсуз Таабалды мырза!. Эки күн бойу, алты саат сиз менен болгон маек, Байланышыбыз абдан кызыктуу жана пайдалуу болду десем аша чапкандык болбойт!. «Кыргыз Көчү» Мекенчилдер тобунун атынан сизге жана сиздин жаныңызда улутубуздун баалуулуктырын даңазалоого зор салым кошуп, айланаңызда жүргөн адамдардын баардыгына Алкыш жана терең ыраазычылык билдирип кетем!. Арыбаңыздар жана ар дайым бар болуңуздар!.

Хатира Асановна. Ден-соолукта болуңуз! Кыргызда сиздей инсандар турганда жаман болбоспуз. Ишиңизди ар дайым ийгиликтер коштосун!

Гүлсана Сарногоева. Урматтуу Таабалды мырза, сизге чын жүрөгүмдөн ыраазычылык билгизем!

Бахтияр Балтабаев. Баатырдын атын алыстан ук, жанына келсең бир киши-дегендей Таабалды абам менен болгон бүгүнкү баарлашуу аябай жакшы таасир калтырды. Бар болуңуз дайым аба!

Гүлжакан Мавланова. Ар дайым зоболоңуз бийик болуп, ишиңизди ийгилик коштосун! Биз сиздей кыргыздын атын алыска угузган уулу менен сыймыктанабыз.

Райкүл Айдаралиева. Көчмөндөр үчүн убактыңызды бөлгөнүңүзгө ыраазычылык билдирем, Сиздей адамдар менен сыймыктанабыз…

Этнокомплекс Супара: Урматтуу Мырзалар жана Айымдар! «Супара» этно-комплексинин 5000 сомдук сертификатын 35 жашында мен сыяктуу изденүүнүн үстүндө жүргөн Бахтияр Балтабаевге ыйгарам. Келип «Супара» этно-комплексине эс алып кетиңиз. (0555 465051) телефонуна чалыңыз!

Бахтияр Балтабаев. Чооң рахмат. Кубанычтамын..

Асыран Айдаралиев. Оо, мынакей, сыйлык дароо эле өз ээсин тапты, чын жүрөктөн куттуктайбыз Бахтияр мырза!. Кут болсун!.

Этнокомплекс Супара. Каалаган убактыңызда келиңиз. Бизден эшик ар күнү саат 11-00 дөн 24-00 гө чейин Сиз үчүн ачык!

Этнокомплекс Супара. Урматтуу мекендештерим, урматтуу Асыран Мырза! Сиздердин мага болгон сый-урматыңыздарга чоң ыракмат! Баарыңыздардын сурооңуздар өтө кызыктуу болду. Мага өзгөчө Айтмырза мырзанын макалаларымды окуп жүргөндүгү жылуу сезим калтырды. Жүрөк кыйнаган маселер Сиздерди да кош көңүл калтырбаганына ыраазы болдум. Бар болгула! Чоң кубаныч менен Сиздер менен көрүшкөнчө!

Айтмырза Абылкасымов: Оо маек бүттүбү? Абдан чын дилден маек болуптур. Бардык суроолорго агынан жарылып, чын дилден эргүү менен жооп берген Таабалды мырзага ыраазычылык! Ал эми Таабалды мырзанын батасы менен кошо материалдык белегин да утуп алган Бахтияр инимди чын дилден куттуктаймын! Алган батаңды жараткан өзү колдоп, ылайым жүзөгө ашсын! Эми бир аз тамаша… Бахтияр, Асанкул куудул айткандай, батага эле ишенип жүрө бербей өзүң да аракет кыл, баатыр!
Айтмырза Абылкасымов: Баса, менин болор болбос суроомо атайын көңүл буруп, белгилей кеткени үчүн, Таабалды мырзага дагы бир жолу ырахмат! Бизди да «Супарадан» жолугушуу насип кылсын!
Мирбек Кыргызстан. Бул «Көч Байланышты» уюштурган Асыран агайга, эки күндөн бери 6 саат убактысын бөлүп суроолорго ачык жооп берген Таабалды агайга чоң рахмат! Бахтияр мырза сыйлыгыңыз кут болсун!

«Көч Байланышты» уйуштурган жана алып барган Асыран АЙДАРАЛИЕВ.
Эркин журналист, Финляндия, Келсинки шаарынан. 17-март, 2014-жыл.

Login