*****************************************************************************************************************
ЭЛ СЫЙМЫГЫ..

«Өмүр бизден өтүп кетсе, эл эмгектен эскерсин!»
Аалы ТОКОМБАЕВ (Балка)

Кезекте кыргыздын даңктуу уулу, дүйнөнү дүңгүрөткөн балбаны, грек-рим күрөшү бойунча КР нын 10-жолку чемпиону, «А» класстагы жогорку категориялуу «Гран При» эл аралык турнирлердин 12-жолку жеңүүчүсү, 1999-жылдагы Афинада болуп өткөн дүйнөлүк чемпионатта коло медалдын, 1994-1998-жылдардагы Азия ойундарынын эки жолку күмүш медалынын жана көптөгөн байгелерди тынбай багындырып келген баатыр жигити Раатбек САНАТБАЕВдин бейнесине белгилүү-белгисиз сүртүмдөрдөн эскерүү катары калтыра берсеңиздер болот..

Гүлжакан МАВЛАНОВА. Кандай аял тууду экен, Раатбектей уулду дегендей эле күйдүрүп кетти го бул кыргызымдын эр азаматы дагы. Кыргыз эмес башка улуттун өкүлү келип “колуңардагы баалуу кымбат нерсеңерди барктай албайт экенсиңер” деп жоктоп ыйлаганда жанына адам туралбайт эле ошондо. Раатбектин эки уулу менин кызым менен окуп калды. Ар дайым ата-энелер чогулушунда узун бойлуу, жөнөкөй жигит кирип келип арткы орунга олтуруп калаар эле. Бир күнү баласы Даулеттен эжейи жадыбалды “үч жерде үч канча болот?” деп сурап жатпайбы. Анда Даулет, “алты” деп жооп берди. Эжейи тууралап, “чоокууң, тогуз болот, кайтала” дейт.. Даулет камаарабай туруп “чоокууң, тогуз болот” деген. Ошол тили балдай ширин балдар бир канкордун азабынан атасыз жетим калды…

Райкүл АЙДАРАЛИЕВА. 2005-жылы Камчыбек Жолдошбаев куда менен кымыз ичкенге Ат-Башыга жайлоого бирге барган экен. Апам-атамдар кой союп, коноктошуп, аркы беркини сүйлөшүп көпкө отурушканын айтып калышат. Кетип жатканда аябай ыраазычылыгын билдирип, “кийин да сөзсүз келип кымыз ичип кетем” дептир. “Ыймандуу, абдан адамкерчиликтүү бала экен, келиндеримден төрөсө неберемдин атын Раатбек коем” – деп ойлоп койчуумун деп калчуу. Айтканындай эле бир инимдин келинчеги уул төрөп, апам анын атын Раатбек деп койгон. Апам өзү деле билбептир, Раатбек Санатбаев деген ким экенин, тек гана жакшы сапаттарына ыраазы болуп, атын койгом дейт. Буйурса Раатбек эмдиги жылы 1- класска барат..

*****************************************************************************************************************
«ЭЛ СЫЙМЫГЫ»

Үсөн КУДАЙБЕРГЕНОВ «Гиннес» китебине кирген биринчи кыргыз. Ал учурунда 27 метр бийиктиктеги аскадан ат менен кошо cууга секирип, эр жүрөктүүлүгү менен бүтүн дүйнө элин таң калтырып, атагы таш жарган чыгаан каскадер болчу. Эң негизгиси айкөл, улуу-кичүүнү бирдей сыйлай билген адамкерчиликтүү жана өз элинин чыныгы мекенчил атуулу эле. 2005-жылдын 24-мартындагы төңкөрүштө тартип коргоочулар чилдей тарап, эмне кылаарын билбей алдастап, алапайларын таппай калган маалда эр жүрөк Үсөн арыдан бери «Элдик кошуун» түзүп, башаламандыкты токтотууга зор салымын кошкон. Көптөгөн банктарды жана башка стратегиялык объектилерди талап-тоноодон сактап калган. Үсөндүн бул эмгеги тарыхта калды. Ошол 2005-жылдын 10-апрелинде канкор, мыкаачылар Үсөндү өз үйүнө келип ит аткандай атып кетишкен. Кайсы канкорлор, эмне себептен атып кеткендиги ушул кезге чейин табышмак..

Дайардаган Асыран АЙДАРАЛИЕВ. Финляндия.